AdSense test ad

पिता और पुत्र की कहानी | Story Of Father And Son | Motivational Story | Hindi 1

Story Of Father And Son



Ek gaon me ek murtikar raha karta tha.
Woh kaafi khubsurat murtiya banaya karta tha.
Aur us kaam se woh acha kama leta tha.

Usse ek beta hua.
Us bache ne bachpan se hi murtiya banani shuru kar di.
Beta bhi bahut achi murtiya banaya karta tha.
Aur baap apne bete ki kamyabi par khush hota tha.

Lekin har baar bete ki murtiyo me koi na koi kami nikal diya karta tha.
Woh kehta tha "Bahut acha kiya hai lekin agli baar is kami ko door karne ki koshish karna".
Beta bhi koi shikayat nahi karta tha.
Woh apne baap ki salah par amal karte hue apni murtiyo ko aur behtar karta raha.

Is lagatar sudhar ki wajah se bete ki murtiya baap se bhi achi banne lagi.
Aur aisa waqt bhi aa gaya ki log bete ki murtiyo ko bahut paise dekar kharidne lage.
Jab ki baap ki murtiya uske pehle wali kimat par hi bikti rahi.

Baap ab bhi bete ki murtiyo me kamiya nikal hi deta tha.
Lekin ab bete ko yeh acha nahi lagta tha.
Aur woh bina mann ke kamiyo ko accept karta tha.
Lekin fir bhi apni murtiyo me sudhar kar hi deta tha.

Ek waqt aisa bhi aaya ki jab bete ke sabr ne jawab de diya.
Baap jab kamiya nikal raha tha.
To beta bola.

"Aap to aise kehte hai jaise aap bahut bade murtikar hai. Agar aap ko itni samajh hoti to aap ki murtiya kam kimat me nahi bikti mujhe nahi lagta aap ki salah lene ki mujhe zaroorat hai meri murtiya perfect hai"

Baap ne bete ki yeh baat suni to usne bete ko salah dena aur uski murtiyo me kamiya nikalna band kar diya.
Kuch mahine to woh ladka khush raha Lekin fir usne notice kya.
Ki log ab uski murtiyo ki utni tareef nahi karte jitni pehle kiya karte the.
Aur uski murtiyo ke daam bhadna bhi band ho gaye.

Shuru me to bete ko kuch samajh nahi aaya.
Lekin fir woh apne baap ke pass gaya aur usse is samsya ke baare me bataya.
Baap ne bete ki baat ko bahut shanti se suna.
Jaise usse pehle se pata tha ek din aisa bhi aayega.
Bete ne bhi is baat ko notice kiya aur usne pucha.
Kya aap jante the ki aisa hone wala hai.

Baap ne kaha.
"Haan kyunki aaj se kai saal pehle me bhi is halat se takraya tha."

Bete ne sawal kiya.
"To aap ne fir mujhe samjhaya kyun nahi."

Baap ne jawab diya.
"Kyunki tum samajhna nahi chahte the. 
Me janta hun ki tumhari jitni achhi murtiya me nahi banata ye bhi ho sakta hai ki murtiyo ke bare me meri salah galat ho.
Par aisa bhi nahi hai ki meri salah ki wajah se kabhi tumhari murti behtar na bani ho. Lekin jab me tumhari murtiyo me kamiya dikhata tha tab tum apni banai hui murtiyo se satisfied nahi hote the tum khud ko behtar karne ki koshish karte the aur wahi behtar hone ki koshish tumhari kamyabi ka kaaran tha.
Lekin jis din tum apne kaam se satisfied ho gaye aur tumne yeh bhi maan liya ki isme aur behtar hone ki gunjaish hi nahi hai tumhari growth bhi ruk gai aur log hamesha tumse behtar ki umeed karte hai aur yahi kaaran hai ki ab tumhari murtiyo ke liye tumhari tareef nahi hoti na hi unke liye tumne jyada paise milte hai.

Beta thodi der chup raha.
fir usne sawal kiya.
To ab mujhe kya karna chahiye.?
Baap ne ek line me jawab diya.
Unsatisfied hona sikho. Maan lo ki tumne hamesha behtar hone ki gunjaish baki hai yahi ek baat tumhe hamesha behtar banne ke liye inspire karti rahegi tumhe hamesha behtar banati rahegi.

- Steve Jobs

Post a Comment

2 Comments